“Universal Bank” ATBda Data Scale loyihasining 2-bosqichi muvaffaqiyatli yakunlandi: yangi avlod RegTech hisobotlari uchun mustahkam poydevor yaratildi.
26 июня 2026 г.

Data Scale kompaniyasi moliya sektori uchun ilg‘or raqamli yechimlarni ishlab chiqish va joriy etishga ixtisoslashgan bo‘lib, «Universal Bank» ATBda korporativ ma’lumotlar ombori (DWH – Data Warehouse)ni yaratish bo‘yicha yirik loyihaning ikkinchi bosqichi muvaffaqiyatli yakunlanganini ma’lum qiladi. «Mijozlar, hisobvaraqlar va ularga tegishli ma’lumotnomalar bo‘yicha DWH (ma’lumotlar ombori)ni loyihalash va ishlab chiqish» deb nomlangan ushbu bosqich bankning zamonaviy RegTech (tartibga soluvchi hisobotlar) tizimini barpo etish yo‘lidagi ilk muhim qadam bo‘ldi.

Loyiha doirasidagi ishlar kelgusida shakllantiriladigan barcha hisobotlar tizimining asosi bo‘ladigan bazaviy ma’lumotlar infratuzilmasini yaratishga qaratildi. Bunda mijozlar, hisobvaraqlar, qoldiqlar, aylanmalar hamda ularga oid zarur ma’lumotnomalar bo‘yicha ma’lumotlarni shakllantirish ustuvor yo‘nalish sifatida belgilandi. O‘zbekistonning raqamli transformatsiya strategiyasiga muvofiq, ma’lumotlarni ishonchli saqlash va qayta ishlash infratuzilmasini yaratish davlat hamda moliya muassasalari oldidagi eng muhim vazifalardan biri hisoblanadi.

Ma’lumotlar ombori arxitekturasini yaratishda kompleks yondashuv

Loyihaning 2-bosqichi doirasida Data Scale mutaxassislari ma’lumotlar omborini yaratishning barcha muhim yo‘nalishlarini qamrab olgan keng ko‘lamli ishlarni amalga oshirdi. Dastlab ma’lumotlar manbai bo‘lgan bankning avtomatlashtirilgan tizimi (ABS) batafsil tahlil qilindi. Bu esa dastlabki ma’lumotlarning tuzilishi va o‘ziga xos xususiyatlarini aniq belgilash hamda ularni to‘g‘ri transformatsiya qilish uchun mustahkam asos yaratdi.

Ushbu tahlil asosida DWH (Data Warehouse) arxitekturasi va ma’lumotlarning fizik modeli uchta asosiy qatlam bo‘yicha ishlab chiqildi:

Raw Data: dastlabki ma’lumotlarni asl ko‘rinishida qabul qilish va saqlash qatlami.

Stage: ma’lumotlarni oraliq tozalash va qayta ishlashga tayyorlash qatlami.

DDS (Data Delivery System): hisobotlarni shakllantirish uchun tayyorlangan ma’lumotlar vitrinasi.

Ma’lumotlarni ishonchli va samarali yuklashni ta’minlash maqsadida S2T (Source-to-Target) moslashtirish xaritalari ishlab chiqildi, CDC (Change Data Capture) vositasi yordamida ma’lumotlardagi o‘zgarishlarni Raw Data qatlamiga tezkor uzatish yo‘lga qo‘yildi. Shuningdek, ombor qatlamlari o‘rtasida ma’lumotlarni uzatish va transformatsiya qilish uchun DDL-skriptlar hamda DBT modellari tayyorlandi.

Erishilgan natijalar va strategik ahamiyati

Loyihaning ushbu bosqichidagi eng muhim natija bankning korporativ ma’lumotlar omborini yanada rivojlantirish uchun mustahkam va kengaytirish imkoniyatiga ega poydevor yaratilganidir. Sinov muhitida Raw Data qatlamiga ma’lumotlarni avtomatik yuklash muvaffaqiyatli yo‘lga qo‘yildi. Shuningdek, ma’lumotlarni Stage va DDS qatlamlari uchun tayyorlash maqsadida ularni normallashtirish va transformatsiya qilish jarayonlari sinovdan muvaffaqiyatli o‘tkazildi. Ushbu natijalar ishlab chiqilgan yechimlarning amalda samarali ishlashini tasdiqlaydi hamda loyihaning navbatdagi, yanada muhim bosqichiga o‘tish uchun mustahkam zamin yaratadi.

“Ushbu bosqich butun loyiha uchun poydevor vazifasini bajaradi, — deydi Data Scale kompaniyasi bosh direktori Roman Solovyov. — Biz nafaqat regulyator hisobotlari bo‘yicha bugungi vazifalarni hal etishga xizmat qiladigan, balki bankning kelgusidagi rivojlanishi va raqamli transformatsiyasi uchun ham mustahkam platforma bo‘ladigan arxitekturani yaratdik. Mijozlar va hisobvaraqlar bo‘yicha sifatli hamda tizimlashtirilgan ma’lumotlar bazasisiz zamonaviy talablarga javob beradigan samarali va ishonchli RegTech tizimini barpo etishning imkoni yo‘q”.

Ishlab chiqilgan loyiha yechimi jarayonning barcha ishtirokchilari uchun yagona arxitektura asosini yaratib, bank jamoasi va ishlab chiquvchilar o‘rtasidagi yondashuv hamda kutilmalarni o‘zaro muvofiqlashtirdi. Yaratilgan poydevor ma’lumotlar bilan ishlash jarayonining shaffofligini oshiradi, keyingi funksional yo‘nalishlarni ishlab chiqishni tezlashtiradi hamda bankning RegTech tizimini izchil rivojlantirish uchun mustahkam asos yaratadi. Bu, ayniqsa, O‘zbekiston Respublikasi Markaziy bankining 2027-yilgacha ma’lumotlarni boshqarishning yangi tizimini joriy etish rejalari doirasida muhim ahamiyat kasb etadi. Mazkur tizim mijozlar, hisobvaraqlar va tranzaksiyalar to‘g‘risidagi ma’lumotlarni avtomatlashtirilgan formatda saqlashni nazarda tutadi.

Loyihaning 2-bosqichi yakunlangani “Universal Bank” ATBning regulyator hisobotlarini raqamli va standartlashtirilgan shaklda yuritishga o‘tish bo‘yicha tashabbusini amalga oshirishdagi muhim qadamlardan biri bo‘ldi. Avvalroq Data Scale kompaniyasi bankda IT-audit o‘tkazish va texnologik rivojlanish strategiyasini ishlab chiqish loyihalarini muvaffaqiyatli amalga oshirgan. Shuningdek, ayni paytda integratsion platformani yaratish bo‘yicha ishlar ham davom etmoqda. Bu kompaniyaning bankni raqamlashtirishga kompleks va tizimli yondashayotganini yana bir bor tasdiqlaydi. Hozirgi bosqichda asosiy e’tibor ma’lumotlar modelini bosqichma-bosqich kengaytirish, integratsiya infratuzilmasini rivojlantirish hamda ma’lumotlar omborini O‘zbekiston Respublikasi Markaziy banki talablarini to‘liq bajarishga tayyor holatga keltirishga qaratilgan.

Kompaniyalar haqida

Data Scale — banklar va moliya tashkilotlari uchun raqamli yechimlarni ishlab chiqishga ixtisoslashgan kompaniya. Xalqaro IT loyihalarida ko‘p yillik tajribaga ega mutaxassislarni birlashtirgan holda, kompaniya mijozlarning samaradorligi, axborot xavfsizligi va uzoq muddatli rivojlanishiga xizmat qiluvchi kompleks hamda kengaytiriladigan tizimlarni yaratadi.

“Universal Bank” ATB — O‘zbekistonning jadal rivojlanayotgan moliyaviy institutlaridan biri bo‘lib, korporativ va chakana mijozlar uchun keng turdagi bank xizmatlarini taqdim etadi. Bank mijozlarga xizmat ko‘rsatish sifati va operatsion samaradorlikni oshirish maqsadida raqamli texnologiyalarni faol joriy etib kelmoqda.